Temir yo‘l va metro mashinistlariga guvohnoma berishning yangi tartibi belgilandi
O‘zbekistonda ilk bor temir yo‘l transporti va metropolitenda tortish harakat tarkibini boshqarish huquqini beruvchi guvohnomalarni rasmiylashtirish bo‘yicha yagona tartib joriy etilmoqda.
Vazirlar Mahkamasining 2026-yil 17-sentabrdagi 502-son qarori bilan ushbu davlat xizmatini ko‘rsatishning ma’muriy reglamenti tasdiqlandi.
Qarorga ko‘ra, 2027-yil 1-yanvardan lokomotiv, motor vagonli harakat tarkibi va metro poyezdlarini boshqarish huquqini beruvchi guvohnomani olish uchun davlat xizmati Yagona interaktiv davlat xizmatlari portali orqali ko‘rsatiladi.
Test sinovlari elektron platformada o‘tkazilib, natijalar avtomatik aniqlanadi. Yangi namunadagi mashinist guvohnomasi 10 yil muddatga beriladi.
Amaldagi mashinistlar 2029-yil 1-yanvarga qadar yangi namunadagi guvohnomani olishlari shart.
Guvohnoma yo‘qolgan, shikastlangan yoki undagi ma’lumotlar o‘zgargan ayrim hollarda qayta test topshirmasdan dublikat olish imkoniyati ham yaratiladi.
