OKMK O‘zbekiston tog‘-kon sanoatida Moody’s reytingini olgan birinchi kompaniya bo‘ldi
“Olmaliq KMK” AJ xalqaro Moody’s reyting agentligidan “Ba2” darajasida, “Barqaror” prognoz bilan kredit reytingini oldi. Kompaniyaning mustaqil kredit bahosi (BCA) esa “ba3” darajasida belgilandi.
Kombinat reytingi O‘zbekistonning suveren reytingi – “Ba2” / “Barqaror” prognoz bilan bir darajada bo‘lib, xorijiy valyutadagi majburiyatlar bo‘yicha mamlakatdagi eng yuqori reyting darajasiga teng.
“Ba3” darajasidagi BCA kompaniyaning davlat ko‘magini hisobga olmagan holdagi o‘z moliyaviy va operatsion salohiyatiga asoslangan kredit qobiliyatini aks ettiradi.
Shu tariqa, “Olmaliq KMK” AJ O‘zbekiston tog‘-kon sanoatida Moody’s kredit reytingini olgan birinchi kompaniya bo‘ldi.
Agentlik kombinatning davlat bilan mustahkam aloqalari, yirik resurs bazasi, mahsulotlar diversifikatsiyasi, tannarx bo‘yicha qulay mavqei hamda ishlab chiqarish hajmini oshirishga qaratilgan investitsiya dasturini ijobiy omillar sifatida qayd etdi.
