O‘zbekiston MDH davlatlari orasida simli internet tezligi bo‘yicha birinchi o‘ringa chiqdi
O‘zbekiston avgust oyida Speedtest Global Index reytingida mobil va simli internet tezligi bo‘yicha uch pog‘onadan yuqoriladi.
Mobil internetda yuklab olish tezligi 62,42 Mbit/s dan 65,27 Mbit/s gacha oshdi. Natijada O‘zbekiston reytingda 75-o‘rindan 72-o‘ringa ko‘tarildi. So‘nggi besh yil ichida mamlakat mobil internet tezligi bo‘yicha 65 pog‘ona yuqorilagan.
Simli internetda esa yuklab olish tezligi bir oyda 94,23 Mbit/s dan 94,50 Mbit/s gacha oshib, O‘zbekiston 76-o‘rindan 73-o‘ringa ko‘tarildi.
Mazkur ko‘rsatkich bilan O‘zbekiston MDH davlatlari orasida simli internet tezligi bo‘yicha birinchi o‘rinni egalladi.
Shuningdek, 2026-yil boshidan buyon mobil internetning yuklab olish tezligi 27 foizga – 51,42 Mbit/s dan 65,27 Mbit/s gacha oshgan.
