Toshkent osmonidagi yorqin iz Xitoy raketasi parvozi bilan bog‘liq bo‘lishi mumkin
19-sentabr oqshomida Toshkent osmonida ortidan uzun yorqin iz qoldirgan obyekt kuzatildi. Hodisa shaharning turli nuqtalarida videoga olingan.
Mirzo Ulug‘bek nomidagi Astronomiya instituti mutaxassislari tasvirlarni dastlabki tahlil qilib, hodisa meteor yoki bolidga xos emasligini ma’lum qildi.
Hisob-kitoblarga ko‘ra, obyekt kuzatilgan vaqt va yo‘nalish o‘sha kuni Xitoyning Taiyuan kosmodromidan uchirilgan Long March-2D (Chang Zheng-2D) raketasi parvozi bilan mos kelmoqda. Raketa PIESAT-2 turkumidagi to‘rtta sun’iy yo‘ldoshni orbitaga olib chiqqan.
Mutaxassislarning taxminicha, Toshkent osmonida ko‘ringan yorqin iz raketaning yuqori bosqichi yoki uchirishdan keyingi orbital jarayonlardan biri bilan bog‘liq bo‘lishi mumkin.
