Cbonds konferensiyasida O‘zbekiston kapital bozoridagi yangi imkoniyatlar muhokama qilindi
17-sentabr kuni Toshkentda Cbondsning “O‘zbekiston Respublikasi kapital bozori” VIII xalqaro konferensiyasi bo‘lib o‘tdi.
Tadbirda kapital bozori likvidligini oshirish, yangi moliyaviy instrumentlarni joriy etish, xorijiy investitsiyalarni jalb qilish, shuningdek, islomiy moliya, sukuk, raqamli aktivlar va tokenizatsiya yo‘nalishlari muhokama qilindi.
“Toshkent” Respublika fond birjasi raisi v.v.b. Fayzulla Tashov yalpi sessiyada korporativ obligatsiyalar bozori, xorijiy investorlar ishtiroki hamda birjaning tahliliy ma’lumotlar infratuzilmasini rivojlantirish rejalari haqida ma’lumot berdi.
Qayd etilishicha, 2024-yildan 2026-yil avgust oyi yakunigacha 39 ta emitent 73 ta korporativ obligatsiya chiqargan, ularning umumiy hajmi 7,86 trln so‘mni tashkil etgan. Xorijiy investorlar egaligidagi obligatsiyalar hajmi esa 1,89 trln so‘mga yetgan.
Shuningdek, bozor, moliyaviy hisobot va savdo ma’lumotlarini yagona tizimda birlashtirishga qaratilgan “Tashkent Stock Exchange bozor ma’lumotlari” loyihasi taqdim etildi. Kelgusida birja ma’lumotlarini Bloomberg, Refinitiv va boshqa xalqaro axborot platformalari bilan integratsiya qilish imkoniyatlari ko‘rib chiqilmoqda.
