Bolalarga nisbatan zo‘ravonlik sodir etgan pedagoglar uchun javobgarlik belgilandi

11-sentabr kuni imzolangan qonun bilan ayrim qonun hujjatlariga o‘zgartirish va qo‘shimchalar kiritildi.

Ma’muriy javobgarlik to‘g‘risidagi kodeksga kiritilgan qo‘shimchalarga ko‘ra, ta’lim tashkilotida voyaga yetmagan bolalarni tarbiyalash va ularga ta’lim berish majburiyati yuklatilgan shaxs tomonidan bolaga nisbatan jismoniy zo‘ravonlik sodir etish, uni kamsitish yoki xo‘rlash, agar qilmishda jinoyat yoki boshqa huquqbuzarlik alomatlari bo‘lmasa, BHMning 1 baravaridan 5 baravarigacha jarima solishga sabab bo‘ladi.

Shuningdek, pedagogik faoliyat davomida voyaga yetmaganlarga nisbatan jismoniy va (yoki) ruhiy zo‘ravonlik bilan bog‘liq huquqbuzarlik uchun ma’muriy javobgarlikka tortilgan shaxs 1 yil davomida pedagogik faoliyat bilan shug‘ullana olmaydi.

Mazkur cheklov maktabgacha, umumiy o‘rta va o‘rta maxsus, professional hamda bolalar uchun qo‘shimcha ta’lim tashkilotlariga tatbiq etiladi.

Qonun bilan, shuningdek, davlat yoki nodavlat muassasalarining to‘liq ta’minotida bo‘lgan voyaga yetmagan bolaga aliment to‘lashi shart bo‘lgan ota yoki onani aliment to‘lashdan ozod qilishga yo‘l qo‘yilmasligi belgilandi.

Ota-ona qaramog‘idan mahrum bo‘lgan bola foydasiga undiriladigan aliment miqdorini kamaytirish bilan bog‘liq ishlarni ko‘rib chiqishda “Inson” ijtimoiy xizmatlar markazlari ham jalb etiladi.

Qonun rasmiy e’lon qilingan kundan e’tiboran kuchga kiradi.