Toshkentdagi Glinka ko‘chasida yuz bergan hodisa sababi ma’lum qilindi

Toshkent shahar hokimligining dastlabki ma’lumotlariga ko‘ra, avariya diametri 219 mm bo‘lgan yerosti gaz quvuridan sizib chiqqan gazning issiqlik tarmog‘i kamerasida to‘planishi oqibatida yuzaga kelgan.

Tekshiruvda quvurning taxminan 375 kv. sm (15×25 sm) maydonidagi bir nechta nuqtadan gaz sizib chiqayotgani aniqlangan.

Mutaxassislar hodisa tafsilotlarini o‘rganmoqda. Tekshiruv yakunlangach, yo‘l qoplamasi tiklanib, yo‘l transport harakati uchun ochilishi rejalashtirilgan.

Mazkur holat yuzasidan jinoyat ishi qo‘zg‘atilgan, tergov davom etmoqda. Vaziyat Toshkent shahar hokimligi nazoratida.