Uy-joyni “rassrochka”ga olish taqiqlanadimi? Yangi tartibga izoh
Ijtimoiy tarmoqlarda 2027-yildan uy-joyni bo‘lib-bo‘lib to‘lash asosida sotib olish taqiqlanishi haqida turli talqinlar tarqalmoqda.
Prezidentning 2026-yil 14-avgustdagi PQ–294-son qarori uy-joyni quruvchidan to‘g‘ridan-to‘g‘ri “rassrochka”ga olishni taqiqlamaydi.
Hujjatga ko‘ra, 2027-yil 1-yanvardan muddatli to‘lov xizmati operatorlari faoliyati alohida tartibga solinadi. Bunda ko‘chmas mulk operator orqali taqdim etiladigan muddatli to‘lov xizmatining obyekti bo‘la olmaydi.
Ya’ni gap uy-joyni umuman bo‘lib to‘lashga sotish haqida emas, balki vositachi operator orqali ko‘chmas mulkni “rassrochka”ga rasmiylashtirish haqida ketmoqda.
Agar quruvchi o‘z uy-joyini xaridorga bevosita bo‘lib-bo‘lib to‘lash sharti bilan sotsa, bu muddatli to‘lov operatori xizmati hisoblanmaydi.
Shu sababli, uy-joyni quruvchining o‘zidan to‘g‘ridan-to‘g‘ri “rassrochka”ga sotib olish imkoniyati saqlanib qoladi.
Yangi tartibga ko‘ra, muddatli to‘lov operatorlari maxsus reyestrga kiritiladi va Markaziy bank nazorati ostida ishlaydi. Ularning shartnomalari, ustama haqlari va komissiyalariga ham aniq talablar belgilanadi.
