Ayrim avtotransport vositalari uchun bojxona boji va utilizatsiya yig‘imining 0 stavkasi qo‘llaniladi
“Avtomobil transportida yuk tashuvlarini amalga oshiruvchi tadbirkorlik subyektlari faoliyatini qo‘llab-quvvatlashga qaratilgan qo‘shimcha chora-tadbirlar to‘g‘risida”gi Prezident qarori (PQ–251-son, 2026-yil 7-iyul) qabul qilindi.
Qarorga muvofiq, yuk tashish uchun mo‘ljallangan va ishlab chiqarilganiga 5 yildan oshmagan ayrim transport vositalarini (samosvallar bundan mustasno) 2027-yil 31-dekabrgacha O‘zbekiston Respublikasiga import qilishda ularga bojxona boji hamda utilizatsiya yig‘imining 0 stavkasi qo‘llaniladi.
Imtiyozlar quyidagi transport vositalariga tatbiq etiladi:
"Yevro-5" va undan yuqori ekologik toifa talablariga javob beradigan avtotransport vositalari (TIF TN kodlari: 8701 21, 8701 22, 8701 23, 8701 24);
To‘la vazni 15 tonnadan ortiq yoki yukxonasining ichki hajmi kamida 76 kub metr bo‘lgan yarim tirkamalar (TIF TN kodi: 8716 39).
Shuningdek, mazkur transport vositalari bojxona rasmiylashtiruvidan o‘tkazilgan sanadan e’tiboran 3 yil mobaynida eksportga realizatsiya qilingan yoki qayta jihozlash natijasida TIF TN kodi o‘zgargan taqdirda, berilgan imtiyozlar bekor qilinadi hamda tegishli to‘lovlar belgilangan tartibda undiriladi.
