Toshkentda xalqaro SAT sertifikatini noqonuniy olish sxemasi fosh etildi
DXX Toshkent viloyati bo‘yicha boshqarmasi va viloyat IIBB xodimlari hamkorligida o‘tkazilgan tezkor tadbirda xalqaro SAT sertifikatini noqonuniy yo‘l bilan olib berish bilan shug‘ullangan guruh faoliyatiga chek qo‘yildi.
Ma’lum qilinishicha, guruh a’zolarining aksariyati Yevropadagi nufuzli universitetning Toshkent filialida, yana bir nafari esa Osiyodagi yetakchi davlatlardan birining oliy ta’lim muassasasi poytaxtdagi filialida tahsil oladi.
Ular Yangihayot tumanidagi xususiy maktab binosida “bunker” tashkil qilgan. IT sohasiga ixtisoslashgan MCHJ mutaxassisi tizimga yashirin kirish imkonini yaratgani, talabalar esa masofadan turib talabgorlar o‘rniga test savollarini yechgani aytilmoqda.
Shuningdek, guruh a’zolaridan biri SAT sertifikatini olmoqchi bo‘lgan 5 nafar fuqarodan har biri uchun 1,5 ming dollar talab qilgan. Ulardan birining puli kriptohamyon orqali olingani qayd etilgan.
Holat yuzasidan Jinoyat kodeksining 168-moddasi – firibgarlik bilan jinoyat ishi qo‘zg‘atilib, tergov harakatlari olib borilmoqda.
