O‘zbekneftgazda kuz-qish mavsumiga tayyorgarlik bo‘yicha tanqidiy yig‘ilish o‘tkazildi
“O‘zbekneftgaz”da kuz-qish mavsumiga tayyorgarlik va gaz qazib chiqarish hajmini barqaror ta’minlash masalalariga bag‘ishlangan tanqidiy yig‘ilish o‘tkazildi.
Qayd etilishicha, yil boshidan buyon gaz qazib chiqarish barqarorligini ta’minlash bo‘yicha keng ko‘lamli ishlar amalga oshirilgan. Shunga qaramay, ayrim yo‘nalishlarda belgilangan ko‘rsatkichlarga erishilmagan.
Yig‘ilishda kuz-qish mavsumi uchun har bir kub metr gaz muhim ekani ta’kidlanib, chuqur quduqlarni o‘zlashtirish, mavjud quduqlar fondidan samarali foydalanish, xorijiy hamkorlar bilan yangi quduqlarni burg‘ilash va ishga tushirish jarayonlarini jadallashtirish bo‘yicha vazifalar belgilandi.
“Gissarneftgaz” qo‘shma korxonasida islohotlar natijasida neft va gaz kondensati qazib chiqarish hajmi ikki barobarga oshgan. Biroq yanvar–avgust oylarida qazib chiqarish rejasi 61 foizga bajarilgan. Yil yakuniga qadar bu ko‘rsatkichni kamida 90 foizga yetkazish vazifasi qo‘yildi.
Shuningdek, sentabrning ikkinchi yarmida yangi quduqlarni ishga tushirish, mavjud quduqlar debitini barqaror saqlash va avariyaviy to‘xtalishlarni kamaytirish bo‘yicha choralar belgilandi.
