Biznesni ro‘yxatga olish 15-oktabrdan boshlanadi
O‘zbekistonda biznesni ro‘yxatga olish tadbiri 2026-yil 15-oktabrdan 30-noyabrgacha o‘tkaziladi. Jarayon 1-oktabr holatidagi ma’lumotlar asosida amalga oshiriladi
Mazkur tadbir Prezidentning 10-sentabrdagi farmoni bilan tasdiqlangan “Statistikani rivojlantirish – 2030” milliy strategiyasi doirasida tashkil etiladi.
Shuningdek, 2027-yil yakuniga qadar aholi va qishloq xo‘jaligini ro‘yxatga olish natijalari asosida aholining statistik registri shakllantiriladi. Uning asosida aholi sonini hisoblash va muntazam e’lon qilib borish tizimi yo‘lga qo‘yiladi.
Registrga davlat organlarining aholiga oid ma’lumotlar bazalari integratsiya qilinadi va ma’lumotlar doimiy yangilanib boradi. Undagi individual ma’lumotlardan davlat organlari, yuridik va jismoniy shaxslarning foydalanishi taqiqlanadi. Ulardan faqat maxsus vakolat berilgan xodimlar statistik maqsadlarda jamlanma ma’lumot tayyorlash uchun foydalanishi mumkin.
Bundan tashqari, 2027-yil 1-yanvardan mikrofirmalar va kichik korxonalar statistika organlari o‘tkazadigan tanlanma kuzatuvlarga yiliga bir martadan ortiq jalb etilmaydi.
