Eng ozoda mahallalarga 500 mln so‘mdan mukofot beriladi

Chiqindilarni boshqarish agentligi “Tabiat uyg‘unligi himoyachisi” va “Eng toza mahalla” tanlovlari doirasidagi rag‘batlantirish choralari haqida ma’lum qildi.

“Tabiat uyg‘unligi himoyachisi” tanlovi doirasida sanitariya tozalash korxonalari va obodonlashtirish boshqarmalarida uzoq yillar mehnat qilayotgan xodimlarning davlat oliy ta’lim muassasalariga o‘qishga kirgan farzandlari yoki nevaralarining kontrakt to‘lovlari qoplab beriladi. Ushbu imkoniyat 100 nafar xodimga taqdim etiladi.

“Eng toza mahalla” tanlovi yakunlariga ko‘ra 14 ta mahalla g‘olib deb topiladi. Har bir g‘olib mahallaga Ekologiya jamg‘armasi hisobidan 500 million so‘m ajratilib, xizmat faoliyati uchun bittadan elektromobil beriladi.

Shuningdek, sanitariya tozalash va obodonlashtirish sohasi xodimlari, eko faollar hamda jamoatchilik ekologiya nazoratchilaridan 100 nafari velosiped bilan rag‘batlantiriladi.