“Dolzarb 40 kunlik”: bayram arafasida hududlardan kuniga 30–40 ming tonna chiqindi olib chiqildi
O‘zbekiston davlat mustaqilligining 35 yilligi arafasida respublika bo‘ylab 28-iyuldan 6-sentabrgacha “Dolzarb 40 kunlik” tozalik tadbirlari o‘tkazilmoqda. Bu haqda Chiqindilarni boshqarish agentligi ma’lum qildi.
Tadbirlar doirasida sanitariya tozalash va obodonlashtirish xizmatlarining tun-u kun navbatchiligi yo‘lga qo‘yilgan. Har kuni chiqindilarni olib chiqish jarayoniga o‘rtacha 4,5 mingta maxsus texnika va 10 mingdan ortiq xodim jalb etilmoqda.
Natijada hududlardan kuniga 30–40 ming tonna chiqindi olib chiqilmoqda. 40 kun davomida jami 1,4 mln tonna qattiq maishiy va 2 ming tonna qurilish chiqindilari olib chiqilib, utilizatsiya qilingan.
Hozirgacha respublikadagi 8 150 ta mahallaning 7 674 tasi tozalik tadbirlari bilan qamrab olingan.
Chiqindilarni belgilanmagan joylarga tashlash bilan bog‘liq 97 ta huquqbuzarlik aniqlanib, jami 165,4 mln so‘mlik ma’muriy jarima qo‘llangan.
Shuningdek, fuqarolardan kelib tushgan 327 ta murojaatning 275 tasi joyida hal etilgan, 52 tasi o‘rganilmoqda.
Respublikadagi jami 1 653 gektar maydonni egallagan 135 ta qattiq maishiy chiqindi poligonida esa kuniga o‘rtacha 4 500–4 700 ta qatnov orqali 14–15 ming tonna chiqindi qabul qilinmoqda.
