Kichik biznesni tekshirishga uch yillik moratoriy joriy etildi

“O‘zbekiston Respublikasi Prezidentining tadbirkorlar bilan VI ochiq muloqotida belgilangan vazifalarni amalga oshirish chora-tadbirlari to‘g‘risida”gi Prezident Farmoniga ko‘ra, kichik tadbirkorlik subyektlari faoliyatini tekshirishga uch yil muddatga moratoriy joriy etildi.

Moratoriy davrida faqat qonunchilikda belgilangan istisno holatlarda – jinoyat ishi, inson salomatligi, mehnat muhofazasi, fuqarolar murojaatlari, QQSni qaytarish hamda korxona tugatilishi bilan bog‘liq holatlarda tekshiruv o‘tkazishga yo‘l qo‘yiladi.

Qolgan holatlarda tekshiruv o‘tkazish noqonuniy hisoblanadi va bunga yo‘l qo‘ygan mansabdor shaxslar javobgarlikka tortiladi.

Shuningdek, moratoriy davrida Biznes-ombudsman tomonidan “Samarali nazorat” tadbiri o‘tkaziladi. Uning doirasida nazorat organlarining so‘nggi uch yildagi tekshiruv faoliyati tahlil qilinib, noqonuniy aralashuvlar aniqlangan taqdirda tadbirkorlarning buzilgan huquqlarini tiklash choralari ko‘riladi.

Mazkur tartib yuzasidan O‘zbekiston Respublikasi Prezidenti huzuridagi Biznes-ombudsman devoni sho‘ba mudiri Botir Usmonaliyev batafsil ma’lumot berdi.