Qish oldidan kuniga qo‘shimcha 2 mln kub metr gaz qazib chiqarish boshlandi
“O‘zbekneftgaz” AJda yangi quduqlarni ishga tushirish va mavjudlarini mukammal ta’mirlash hisobiga tabiiy gaz qazib chiqarish hajmi oshirilmoqda.
1–24-avgust kunlari ishga tushirilishi rejalashtirilgan 11 ta quduqdan 8 tasida burg‘ilash ishlari yakunlanib, 7 tasi ishga tushirildi. Natijada kuniga qo‘shimcha 1,7 mln kub metr tabiiy gaz qazib chiqarish imkoniyati yaratildi.
Shuningdek, mukammal ta’mirlash rejasidagi 8 ta quduqning barchasidan sanoat miqyosida gaz oqimi olinib, rejalashtirilgan 235 ming kub metr o‘rniga kuniga 310 ming kub metr qo‘shimcha gaz olishga erishildi.
Shu tariqa, yangi va ta’mirdan chiqarilgan quduqlar hisobiga kunlik qo‘shimcha gaz hajmi 2 mln kub metrdan oshdi.
21–31-avgust kunlari yana 11 ta quduqni ishga tushirish va kuniga qo‘shimcha 340 ming kub metr gaz olish vazifasi belgilangan.
