Uy sotib olishdan oldin uning qonuniyligini onlayn tekshirish mumkin
O‘zbekistonda uy-joy sotib olishda firibgarlik holatlarining oldini olish va qurilayotgan obyektning qonuniyligini aniqlash uchun dshk.shaffofqurilish.uz geoportali faoliyat yuritmoqda.
Qurilish va uy-joy kommunal xo‘jaligi vazirligi tizimidagi portal orqali noqonuniy qurilishlar, obyektlarning holati hamda shaharsozlik hujjatlariga oid ma’lumotlarni tekshirish mumkin.
Maxsus reyestrda qonunbuzarlik aniqlangan obyektlarning manzili, maydoni va fotosuratlari joylashtirilgan. Xarita orqali obyekt holati ranglar bilan ko‘rsatiladi: ko‘k – qurilish qonuniy davom etmoqda, qizil – qurilish ishlari to‘xtatilgan, qora – qurilish bekor qilingan.
Agar qurilayotgan obyekt xaritada umuman ko‘rsatilmagan bo‘lsa, bu uning rasmiy reyestrga kiritilmaganini anglatadi.
Shuningdek, tizim orqali obyekt davlat nazoratida ekanligi, buzilish yoki renovatsiya rejasiga kiritilgan-kiritilmaganini ham oldindan tekshirish mumkin.
