O‘zbekiston haqidagi kitoblar Koreya Milliy Assambleyasi kutubxonasiga topshirildi
“O‘zbekgidroenergo” AJ tomonidan O‘zbekiston tarixi, milliy davlatchiligi, madaniy merosi va bugungi taraqqiyotiga bag‘ishlangan kitoblar jamlanmasi Koreya Respublikasi Milliy Assambleyasi kutubxonasiga taqdim etildi.
To‘plamdan Prezident Shavkat Mirziyoyevning asarlari, shuningdek, O‘zbekiston tarixi va madaniy merosiga oid ilmiy-ma’rifiy nashrlar hamda mamlakatning zamonaviy rivojlanishini aks ettiruvchi kitoblar o‘rin olgan.
Mazkur nashrlar Koreya Milliy Assambleyasi kutubxonasining Markaziy Osiyo pavilyoniga joylashtiriladi. Ular koreyalik tadqiqotchilar, talabalar va kitobxonlar uchun O‘zbekiston haqida ma’lumot beruvchi manbalardan biri bo‘ladi.
Tashabbus “O‘zbekgidroenergo” AJ vakillarining Koreyaga xizmat safari doirasida amalga oshirilgan.
