Prezident Toshkentni rivojlantirish bo‘yicha yangi vazifalarni belgiladi
Prezident Shavkat Mirziyoyev Olmazor tumaniga tashrifi davomida “ToshTech” texnika universiteti faoliyati bilan tanishdi, shuningdek, Toshkent shahrini ijtimoiy-iqtisodiy rivojlantirish masalalari bo‘yicha videoselektor yig‘ilishini o‘tkazdi.
“ToshTech”ga 2026/2027-o‘quv yili uchun 1 654 nafar abituriyent hujjat topshirib, 400 nafari 100 foiz davlat granti asosida o‘qishga qabul qilindi. Universitetda ta’lim to‘liq ingliz tilida olib boriladi.
Yig‘ilishda kelgusi yili poytaxtga 10 mlrd dollar investitsiya jalb qilish va 150–200 mingta yuqori daromadli doimiy ish o‘rni yaratish bo‘yicha aniq reja ishlab chiqish topshirildi.
Shuningdek, Toshkentdagi 100 ta ko‘chani kompleks yangilash uchun 1 trln so‘m ajratilgani, 400 ta mahallani “Qichqiriq” namunasi asosida obod qilish uchun esa 4 yillik 10 trln so‘mlik dastur ishlab chiqilishi ma’lum qilindi.
Poytaxtda biznes boshlamoqchi bo‘lgan tadbirkorlar uchun garovsiz kredit limiti 100 mln so‘mdan 200 mln so‘mga oshiriladi. Yil yakunigacha 20 ming nafar aholini daromadli ish bilan ta’minlash vazifasi qo‘yildi.
Bundan tashqari, Yoshlar shaharchasida 42 gektar maydonda IT-park, yuqori texnologiyali sanoat va ta’lim obyektlarini birlashtirgan innovatsion klaster tashkil etish rejalashtirilgan.
Olmazorda 75 ming nafar talaba tahsil olishi hisobga olinib, ularning ta’limi, yashashi, bandligi va xavfsizligini qamrab oluvchi yaxlit tizim yaratish belgilandi. Talabalar shaharchasida yo‘lga qo‘yilgan davomat va kirib-chiqishni onlayn nazorat qilish tizimini kelgusi yili mamlakatdagi barcha oliy ta’lim muassasalariga joriy etish vazifasi qo‘yildi.
