Maktablarda choraklik baho 100 ballik tizim asosida shakllantiriladi

Maktabgacha va maktab ta’limi vazirligi yangi baholash tizimining asosiy mezonlari haqida ma’lumot berdi.

Unga ko‘ra, yangi tizim o‘quvchining faqat yodlagan ma’lumotlarini emas, balki mavzuni qay darajada tushungani, mustaqil fikrlashi va bilimini amalda qo‘llay olishini baholashga qaratilgan.

Choraklik natija jami 100 ball asosida shakllantiriladi:

– Formativ baholash – 10 ball. Dars davomida o‘quvchining o‘zlashtirishi kuzatiladi, xatolar aniqlanib, ularni tuzatish imkoniyati beriladi;
– BSB – bob bo‘yicha summativ baholash – 50 ball. O‘quvchining mavzu yoki bo‘limni qay darajada o‘zlashtirgani baholanadi;
– CHSB – chorak bo‘yicha summativ baholash – 40 ball. Chorak davomida egallangan umumiy bilim va amaliy ko‘nikmalar yakuniy baholanadi.

Vazirlik qayd etishicha, yangi baholash tizimi o‘quvchining joriy natijasini aniqlash bilan birga, keyingi o‘zlashtirish ko‘rsatkichlarini yaxshilashga xizmat qiladi.