O‘zbekiston va Mo‘g‘uliston “Orol–Gobi” ekologik tashabbusini ishlab chiqadi
Ma’lum qilinishicha, O‘zbekiston Respublikasi Prezidentining ekologiya masalalari bo‘yicha maslahatchisi – Ekologiya va iqlim o‘zgarishi milliy qo‘mitasi raisi Aziz Abduhakimov Mo‘g‘ulistonning atrof-muhit va iqlim o‘zgarishi vaziri S. Sandag-Ochir bilan uchrashgan.
Muloqot davomida atrof-muhitni muhofaza qilish, degradatsiyaga uchragan yerlarni tiklash va iqlim o‘zgarishiga moslashish yo‘nalishlarida hamkorlikni kengaytirish masalalari muhokama qilingan.
Qayd etilishicha, uchrashuv yakunida tomonlar qurg‘oqchil hududlar ekotizimlarini tiklash hamda qum va chang bo‘ronlarini kamaytirishga qaratilgan “Orol–Gobi” hamkorligi tashabbusini birgalikda ishlab chiqishga kelishib olgan.
Birinchi bosqichda O‘zbekiston va Mo‘g‘ulistonda pilot hududlarni aniqlash, ustuvor yo‘nalishlarni belgilash hamda aniq loyiha takliflarini tayyorlash rejalashtirilgan. Bunda degradatsiyaga uchragan yerlar va yaylovlarni tiklash, qum va chang bo‘ronlari xavfini kamaytirish hamda yer resurslarini barqaror boshqarishga alohida e’tibor qaratiladi.
Shuningdek, qo‘shma loyihalarni amalga oshirish uchun Adaptatsiya jamg‘armasi, Global ekologik jamg‘arma, Yashil iqlim jamg‘armasi, Jahon banki va boshqa xalqaro moliyaviy mexanizmlar imkoniyatlaridan foydalanish ko‘zda tutilmoqda.
Bundan tashqari, Markaziy Osiyo va Mo‘g‘ulistonda yer resurslarini boshqarish bo‘yicha investitsiyaga tayyor loyihalarni ishlab chiqishga xizmat qiluvchi CA+M Land PPF mexanizmini tashkil etish ham rejalashtirilmoqda.
