Toshkentdagi 1912-yilgi tarixiy bino Zamonaviy san’at markaziga aylantirildi
Toshkent markazida 1912-yilda qurilgan sobiq dizel elektr stansiyasi binosi qayta tiklanib, Toshkent Zamonaviy san’at markaziga aylantirildi.
Uzoq yillar davomida qarovsiz qolgan va yo‘qolib ketish xavfi ostida bo‘lgan mazkur inshoot shahar sanoat me’morchiligining noyob namunalaridan biri hisoblanadi.
Prezident Shavkat Mirziyoyev tashabbusi bilan tarixiy binoni asrab qolish va undan san’at rivojiga xizmat qiladigan zamonaviy madaniy makon sifatida foydalanish bo‘yicha loyiha amalga oshirildi. Natijada bino Markaziy Osiyoda o‘ziga xos zamonaviy san’at maskaniga aylantirildi.
Markaz mahalliy rassomlar va yosh tadqiqotchilarni qo‘llab-quvvatlash, xalqaro hamkorlikni rivojlantirish hamda yangi ijodiy imkoniyatlar yaratishga xizmat qiladi.
Markaz faoliyati “Hikmah” ko‘rgazmasi bilan boshlanadi. Unda 11 nafar san’atkorning asarlari orqali tarixiy meros, ajdodlar xotirasi va zamonaviy san’at o‘rtasidagi uyg‘unlik namoyish etiladi.
