Тoshkentdagi oliygohlarda yangi o‘quv yilidan birinchi smena darslari soat 08:00 da boshlanadi
Oliy ta’lim, fan va innovatsiyalar vazirligi ma’lum qilishicha, 2026/2027-o‘quv yilidan boshlab Toshkent shahrida joylashgan oliy ta’lim tashkilotlarida birinchi smenadagi o‘quv mashg‘ulotlari soat 08:00 da boshlanadi.
Mazkur tartib poytaxtda transport oqimini samarali tashkil etish, ertalabki va kechki tig‘iz vaqtlarda yo‘llardagi yuklamani kamaytirish hamda ta’lim jarayonini maqbul tashkil etishga qaratilgan.
Vazirlik qayd etishicha, darslarning ertaroq boshlanishi talabalar va professor-o‘qituvchilarning harakatlanish vaqtini oqilona rejalashtirish, kun davomida ta’lim jarayonini samarali tashkil etish va shahardagi transport oqimini bir maromda taqsimlashga xizmat qiladi.
Shuningdek, kunduzgi va kechki ta’lim shakllarida tahsil olayotgan talabalar uchun o‘quv kunini to‘g‘ri rejalashtirish hamda mashg‘ulotlar va boshqa o‘quv faoliyati uchun vaqt imkoniyatlarini kengaytirish ko‘zda tutilgan.
Yangi tartib faqat Toshkent shahridagi oliy ta’lim tashkilotlarining birinchi smenasidagi mashg‘ulotlarga taalluqli.
