O‘zbekiston va Braziliya suv ta’minoti sohasida hamkorlik imkoniyatlarini muhokama qildi
“O‘zsuvta’minot” AJ boshqaruvi raisi Ahmad Suvankulov boshchiligidagi O‘zbekiston delegatsiyasi suv ta’minoti va oqova suvlarni boshqarish bo‘yicha ilg‘or tajribani o‘rganish maqsadida Braziliyaning San-Paulu shahrida bo‘lib turibdi.
Safar davomida delegatsiya davlat-xususiy sheriklik mexanizmlari, sohani tartibga solish, xususiy sektor ishtirokini kengaytirish hamda institutsional boshqaruv modellari bilan tanishmoqda.
Delegatsiya a’zolari SANASA Campinas kompaniyasi rahbariyati bilan muzokaralar o‘tkazdi. Unda ichimlik suvi va oqova suv tizimlarini samarali boshqarish, zamonaviy texnologiyalarni joriy etish, infratuzilmani yangilash, xizmatlar sifatini oshirish hamda suv resurslaridan oqilona foydalanish masalalari muhokama qilindi.
Tomonlar, shuningdek, tajriba almashish, professional hamkorlikni rivojlantirish va ilg‘or amaliyotlarni O‘zbekistonda qo‘llash imkoniyatlarini ko‘rib chiqdi.
