O‘zbekiston va Ozarbayjonda ishlagan fuqarolarning pensiya huquqlari kengaytiriladi
2026-yil 23-avgust kuni Toshkentda O‘zbekiston va Ozarbayjon prezidentlari huzurida pensiya ta’minoti sohasida hamkorlik to‘g‘risidagi Bitim imzolandi. Hujjat ikki davlatda mehnat qilgan fuqarolarning pensiya huquqlarini ta’minlashga qaratilgan.
Bitimga ko‘ra, agar bir davlatda to‘plangan ish staji pensiya huquqini olish uchun yetarli bo‘lmasa, ikkinchi davlatda orttirilgan tegishli staj ham hisobga olinadi. Bunda har bir davlat pensiya miqdorini o‘z hududida orttirilgan ish stajiga muvofiq hisoblaydi.
Tayinlangan pensiya fuqaro ikkinchi davlat yoki uchinchi mamlakatga ko‘chib o‘tgani sababli kamaytirilmaydi, to‘xtatilmaydi yoki bekor qilinmaydi. Fuqaroning arizasiga ko‘ra, pensiya uni tayinlagan davlatda to‘lanishi yoki ikkinchi davlat hududiga o‘tkazilishi mumkin.
Shuningdek, pensiya tayinlash, qayta hisoblash va to‘lash bo‘yicha murojaatlarni tomonlardan birining vakolatli muassasasiga topshirish imkoniyati yaratiladi. O‘zbekiston va Ozarbayjonning tegishli organlari o‘rtasida to‘g‘ridan-to‘g‘ri axborot almashinuvi yo‘lga qo‘yiladi.
Bitim zarur tartib-taomillar yakunlangach kuchga kiradi.
