Saida Mirziyoyeva Buxoroda topshiriqlar ijrosini joyiga chiqib o‘rgandi

Prezident Administratsiyasi rahbari Saida Mirziyoyeva Buxoro viloyatiga tashrif buyurib, may oyida belgilangan vazifalar ijrosi va amalga oshirilgan ishlar natijalarini joyiga chiqib ko‘rdi.

Xususan, “Jo‘yizar” kanalining 9 kilometri betonlashtirildi, yana 10 kilometrida ishlar davom etmoqda. Natijada yiliga 12 million kub metr suv tejash imkoniyati yaratiladi. Shu hududda baliqchilik xo‘jaligi ham ishga tushirildi.

“Shayxoncha” mahallasida esa 240 o‘rinli zamonaviy bog‘cha barpo etildi.

Tashrif davomida Buxoroning turizm salohiyatini oshirishga qaratilgan “Afshona” majmuasi, etno-uylar, “Jo‘yi Muliyon” kanalini tiklash, yangi aeroport yaqinida mehmonxonalar va turizm klasterini tashkil etish masalalari ham muhokama qilindi.

Saida Mirziyoyeva asosiy maqsad Buxoroga yiliga 10 million sayyohni jalb qilish va viloyatni tranzit hudud emas, balki to‘laqonli sayohat maskaniga aylantirish ekanini ta’kidladi.

Tashrif yakunida Prezident Administratsiyasi rahbari Buxorodagi “Yetti pir” qadamjolarini ziyorat qildi.