Octobank 9 oyda 266,36 mlrd so‘m foyda ko‘rdi

Octobankning 2026-yil yanvar–sentabr oylaridagi foydasi o‘tgan yilning mos davriga nisbatan 57,53 foizga oshib, 266,36 mlrd so‘mni tashkil etdi. 1-oktabr holatiga aktivlar yil boshidan 178,87 foizga o‘sib, 14,62 trln so‘mga yetdi.

Kredit portfeli 104,56 foizga oshib, 832,68 mlrd so‘mni, xususiy kapital esa 1,30 trln so‘mni tashkil etdi. Kapital rentabelligi (ROE) 27,4 foiz, sof foizli daromad 439,39 mlrd so‘m bo‘ldi. Mijozlar soni 3,66 milliondan oshdi.

Bank uy-joy xaridi uchun «Ipoteka», yangi avtomobillar uchun «Avtokredit 1.0», ishlatilgan avtomobillar uchun «Avtokredit 2.0» dasturlarini ishga tushirdi.

Internet-ekvayring hamkorlari uchun Apple Pay va Google Pay orqali to‘lov qabul qilish yo‘lga qo‘yildi. Korporativ mijozlarga 16 ta valyutada konversiya va xalqaro to‘lovlar imkoniyati yaratildi. Hamkor ilovalar orqali Turkiya, Xitoy, Tojikiston va boshqa mamlakatlarga pul o‘tkazish imkoniyatlari kengaydi.

Octobank Global Banking & Finance Awards 2026 doirasida O‘zbekistondagi eng yaxshi raqamli bank va g‘aznachilik operatsiyalari bo‘yicha eng yaxshi bank deb topildi.

Bank 24–26-avgust kunlari Toshkentda o‘tgan Silk Road Finance & Technology Forumda asosiy hamkor sifatida qatnashib, yettita departamenti yechimlarini taqdim etdi. Xitoydagi CIFIT ko‘rgazmasida xalqaro hisob-kitoblar va savdoni moliyalashtirish bo‘yicha muzokaralar olib bordi.

Mayamidagi SIBOS 2026 ko‘rgazmasida O‘zbekiston banklari orasida o‘z stendiga ega yagona ishtirokchi bo‘lib, 100 dan ortiq ishbilarmonlik uchrashuvi o‘tkazdi. Bank Nyu-Yorkdagi Times Square ekranlarida ham namoyish etildi.

Octobank PCI DSS v4.0.1 to‘lov kartalari xavfsizligi standartiga muvofiqligini tasdiqladi va korrupsiyaga qarshi boshqaruv bo‘yicha ISO 37001:2025 sertifikatini oldi. Shuningdek, talabalar uchun moliyaviy savodxonlik mashg‘ulotlarini tashkil etdi hamda «Yangi O‘zbekiston» universitetida «Keys-klub» faoliyatini yo‘lga qo‘ydi.

Reklama