“Biznesni rivojlantirish banki” Quvasoyda tadbirkorlar loyihalarini joyiga chiqib o‘rgandi
Quvasoy shahrida “Biznesni rivojlantirish banki” ATB rahbariyati tadbirkorlar bilan bevosita muloqot o‘tkazib, ularning yangi loyihalari, moliyalashtirishga bo‘lgan ehtiyoji va faoliyatni kengaytirish imkoniyatlarini joyida o‘rgandi.
Uchrashuv davomida tadbirkorlarning taklif va muammolari tinglanib, ularni hal etish bo‘yicha amaliy moliyaviy yechimlar va bank imkoniyatlari muhokama qilindi.
Xususan, “Bog‘bon” MFY hududida faoliyat yurituvchi “OsiyoZaminSharbati” fermer xo‘jaligining 55 sotix maydonda qora malina yetishtirish loyihasi bilan tanishildi. Loyihani rivojlantirish va keyingi bosqichga olib chiqish imkoniyatlari ham ko‘rib chiqildi.
Bank tomonidan hududlarda tadbirkorlar bilan o‘tkazilayotgan bunday uchrashuvlar istiqbolli biznes tashabbuslarini aniqlash, mavjud muammolarga amaliy yechim topish va loyihalarni moliyaviy qo‘llab-quvvatlashga qaratilgan.
