Qanliko‘lda 400 ta xonadon kooperatsiya asosida daromadli loyihalarga jalb etiladi
“Biznesni rivojlantirish banki” ATB tomonidan Qoraqalpog‘iston Respublikasining Qanliko‘l tumanida tadbirkorlar va tashabbuskor aholi vakillari bilan uchrashuv o‘tkazildi.
Bank Boshqaruvi raisi Saxi Annaklichev “Arzimbetko‘m” MFYda qulupnay yetishtirish tajribasiga ega Ixlasbay Niyatbayev faoliyati bilan tanishdi. Tadbirkor bank ko‘magida ushbu yo‘nalishda 100 ta xonadonni kooperatsiya asosida birlashtirish tashabbusini bildirgan.
Shuningdek, “Jer altin g‘aziynem” fermer xo‘jaligi rahbari Muratbay Aralbayevning 70 sotix maydonda ежевика, goji va malina yetishtirish hamda 8 gektar ko‘lda baliqchilikni yo‘lga qo‘yish tajribasi o‘rganildi.
Ikki tadbirkor tajribasi asosida tumanda jami 400 ta xonadonni kooperatsiyaga jalb etish, ularni agrotexnologiyalarga o‘rgatish va yetishtirilgan mahsulotni xarid qilish tizimini yo‘lga qo‘yish bo‘yicha kelishuvga erishildi. Buning uchun maxsus o‘quv markazi tashkil etilib, jarayonga “Agrostar holding” mutaxassislari jalb qilinadi.
