Aktrisa Yodgora Ziyomuhamedova 74 yoshida vafot etdi
O‘zbekistonda xizmat ko‘rsatgan artist, teatr, kino va dublyaj aktrisasi Yodgora Ziyomuhamedova 74 yoshida vafot etdi.
U 34 yildan ortiq vaqt davomida O‘zbekiston davlat yosh tomoshabinlar teatrida faoliyat yuritib, sahnada 100 ga yaqin obraz yaratgan. “Qizil shapkacha”dagi Qizil shapka, “Zumrad va Qimmat”dagi Qimmat, “Farzandim jigarbandim”dagi Sanobar, “Sening taqdiring”dagi Nazira, “Yarash-yarash”dagi Pokiza, “Burgut”dagi Gulnur va “Birinchi muallim”dagi Oltinoy obrazlari uning mashhur rollari qatoridan o‘rin olgan.
Yodgora Ziyomuhamedova televideniye va kino sohasida ham samarali ijod qilgan. Xususan, u bolalar orasida mashhur bo‘lgan “Oqshom ertaklari” ko‘rsatuvini 25 yil davomida olib borgan.
