O‘zbekiston gidroenergetikasini kengaytirishda Koreya texnologiyalari o‘rganilmoqda
O‘zbekistonda gidroenergetikani rivojlantirish, kichik va mikro GESlar tarmog‘ini kengaytirish hamda zamonaviy texnologiyalarni joriy etish bo‘yicha belgilangan strategik vazifalar doirasida “O‘zbekgidroenergo” AJ delegatsiyasi Janubiy Koreya tajribasini o‘rganmoqda.
Ma’lum qilinishicha, delegatsiya gidroenergetika uskunalari ishlab chiqarishga ixtisoslashgan Kumsung Engineering & Construction Co., Ltd. kompaniyasi zavodida bo‘lib, zamonaviy gidroagregatlarni loyihalash, ishlab chiqarish va sinovdan o‘tkazish jarayonlari bilan tanishgan.
Asosiy e’tibor past bosimli suv oqimlaridan samarali foydalanishga mo‘ljallangan kichik va mikro GES texnologiyalariga qaratilgan. Mazkur yechimlar O‘zbekistonda mavjud suv resurslaridan samaraliroq foydalanish va “yashil” energetika quvvatlarini kengaytirish nuqtayi nazaridan o‘rganilmoqda.
Delegatsiya Janubiy Koreyaning Geum River daryosida joylashgan Baekjebo GES faoliyati bilan ham tanishdi. 2011-yilda foydalanishga topshirilgan stansiyada umumiy quvvati 2,64 MVt bo‘lgan 4 ta gidroagregat ishlaydi.
Qayd etilishicha, so‘nggi yillarda O‘zbekistonda GESlar soni 36 tadan 106 taga, gidroenergetikaning umumiy quvvati esa 2,5 GVtga yetgan. Koreya tajribasini o‘rganish texnologik hamkorlikni kengaytirish va yangi gidroenergetika loyihalarini zamonaviy yechimlar asosida rivojlantirishga qaratilgan.
