Prezident kichik va mikro GESlarni rivojlantirish bo‘yicha yangi choralarni ko‘rib chiqdi
Prezident Shavkat Mirziyoyev kichik va mikro gidroelektr stansiyalari tarmog‘ini rivojlantirishga qaratilgan navbatdagi chora-tadbirlar taqdimoti bilan tanishdi.
Xususiy sektor ishtirokida jami 164 megavatt quvvatli qariyb 3 mingta kichik va mikro GES qurish rejalashtirilgan. Hozirgacha 64 ta loyiha ishga tushirilib, ularning umumiy quvvati 41,6 megavattga yetgan. 932 ta loyiha bo‘yicha tashabbuskor aniqlangan.
Taqdimotda investorlar uchun shartlarni soddalashtirish maqsadida auksionlarda elektr energiyasini xarid qilish tarifining eng quyi chegarasini belgilash va tariflarni stansiya quvvatiga qarab tabaqalashtirish taklif qilindi.
Shuningdek, 100 kilovattgacha bo‘lgan mikro GESlarni loyihalash va qurish soddalashtiriladi, 50 kilovattgacha bo‘lgan loyihalar esa shaharsozlik hujjatlari ekspertizasi va davlat arxitektura-qurilish nazoratidan ozod etiladi.
Sohadagi jarayonlarni to‘liq qamrab oluvchi raqamli platforma joriy etish, uskunalar va butlovchi qismlarni mahalliylashtirish ham ko‘zda tutilgan. Hozirda zarur gidroagregat va butlovchi qismlarning qariyb 90 foizi import qilinadi.
2030-yilgacha kichik va mikro GESlar quvvatini 204,8 megavattga yetkazib, yiliga 620 mln kilovatt-soat “yashil” elektr energiyasi ishlab chiqarish rejalashtirilgan. Bu 350 mingta xonadonni elektr energiyasi bilan ta’minlash, yiliga 187 mln kub metr tabiiy gazni tejash imkonini beradi.
