Ertaga O‘zbekistonda “Avtomobilsiz kun” aksiyasi o‘tkaziladi
10-sentabr kuni respublikaning barcha hududlarida navbatdagi “Avtomobilsiz kun” aksiyasi bo‘lib o‘tadi.
Aksiya avtomobillardan chiqadigan zararli tashlamalarni kamaytirish, ekologik barqarorlikni ta’minlash hamda jamoat transporti, velosiped va boshqa ekologik toza transport vositalaridan foydalanishni keng targ‘ib qilishga qaratilgan.
Prezidentning 2026-yil 25-martdagi farmoniga muvofiq, har oyning 10 va 25-sanalarida “Avtomobilsiz kun” va “Avtomobilsiz hafta” aksiyalari o‘tkazib kelinmoqda.
Aksiya doirasida davlat fuqarolik xizmatchilarining avtotransport vositalaridan foydalanishi javobgarlikka sabab bo‘lishi mumkin.
Ekologiya qo‘mitasi davlat va nodavlat tashkilotlari hamda fuqarolarni jamoat transporti, velosiped, elektromobil va boshqa “yashil” transport vositalaridan ko‘proq foydalanishga chaqirdi.
