Banklar kibertahdidlar haqida real vaqtda ogohlantiriladi
Markaziy bankning “CERT-CBU” Kiberxavfsizlik markazi tomonidan moliya bozori ishtirokchilari o‘rtasida kibertahdidlar haqida real vaqt rejimida axborot almashish tizimi joriy etildi.
Endilikda bir bankda yangi fishing havolasi, zararli internet-resurs, shubhali IP-manzil yoki boshqa kiberxavf aniqlansa, bu haqdagi ma’lumot tizimning boshqa ishtirokchilariga ham tezkor yetkaziladi. Natijada bank va to‘lov tashkilotlari tahdid mijozlar yoki o‘z tizimlariga ta’sir qilishidan oldin himoya choralarini ko‘rishi mumkin.
Hozirda tizimga barcha tijorat banklari, to‘lov tizimi operatorlari, valyuta birjasi, KATM kredit byurosi va 20 ta to‘lov tashkiloti ulangan.
Markaziy bank fuqarolarni bank kartasi maxfiy ma’lumotlari va SMS orqali kelgan tasdiqlash kodlarini hech kimga bermaslikka chaqirdi.
