Shavkat Mirziyoyev Koreyaga uch kunlik davlat tashrifini boshladi

O‘zbekiston Prezidenti Shavkat Mirziyoyev rafiqasi hamrohligida davlat tashrifi bilan Seul shahriga yetib bordi.

Koreya Respublikasi Harbiy-havo kuchlarining Seuldagi aviabazasida oliy martabali mehmonlarni tantanali kutib olish marosimi bo‘lib o‘tdi. Davlatimiz rahbari sharafiga faxriy qorovul saf tortdi, artilleriya to‘plaridan salyut berildi.

O‘zbekiston Prezidentini Koreya Respublikasi Bosh vaziri o‘rinbosari – iqtisodiyot va moliya vaziri Ku Yun Chxol hamda boshqa rasmiylar kutib oldi.

Uch kunlik tashrif doirasida Prezident Li Chje Myon bilan tor doirada va kengaytirilgan tarkibda muzokaralar o‘tkazilishi rejalashtirilgan.

Shuningdek, Milliy Assambleya Spikeri Cho Chjon Shik, Bosh vazir Han Son Suk, Koreyaning yirik kompaniyalari va moliya institutlari rahbarlari hamda ushbu mamlakatda istiqomat qilayotgan vatandoshlar bilan uchrashuvlar bo‘lib o‘tadi.

Shavkat Mirziyoyev O‘zbekiston – Koreya biznes forumi ochilishida nutq so‘zlaydi. 16-sentabr kuni esa Prezident birinchi “Markaziy Osiyo – Koreya Respublikasi” sammitida ishtirok etadi.

Tashrifning siyosiy va iqtisodiy dasturi bilan bir qatorda Seul va Koreyaning boshqa shaharlarida O‘zbekiston madaniyati kunlari o‘tkaziladi.