Navoiyda “MPS Turon” o‘quv-amaliyot markazi foydalanishga topshirildi
“O‘zbekiston temir yo‘llari” AJ tizimida zamonaviy “MPS Turon” o‘quv-amaliyot markazi tashkil etildi. Markaz Buxoro mintaqaviy temir yo‘l uzeli filiali tarkibidagi Navoiy signallashtirish va aloqa masofasida faoliyat yuritadi.
Yangi markaz temir yo‘l sohasida zamonaviy texnologiyalarni o‘rganish, amaliy ko‘nikmalarni mustahkamlash hamda yuqori malakali mutaxassislar tayyorlashga mo‘ljallangan.
Bu yerda mahalliy mutaxassislar tomonidan ishlab chiqilgan MPS Turon, MPAB Turon, DTS Turon va MAPS Turon tizimlarini temir yo‘l tarmog‘ida keng joriy etish va ulardan samarali foydalanish bo‘yicha kadrlar tayyorlanadi.
Markazda yiliga 28 nafar mutaxassis, jumladan, 8 nafar dasturchi va 20 nafar montaj elektromexanigini tayyorlash imkoniyati mavjud.
Loyiha temir yo‘l sohasini raqamlashtirish, mahalliy dasturiy yechimlardan foydalanishni kengaytirish hamda malakali kadrlar tayyorlashga xizmat qiladi.
