O‘zbekiston, Ozarbayjon va Turkiya harbiylari “Birlik kuchi – 2026” qo‘shma mashg‘ulotlarini boshladi
Ozarbayjon Respublikasining Qorabog‘ iqtisodiy hududidagi “Qizilgaya” o‘quv-mashg‘ulot markazida Ozarbayjon, Turkiya va O‘zbekiston harbiylari ishtirokida “Birlik kuchi – 2026” qo‘shma harbiy mashg‘ulotlarining ochilish marosimi bo‘lib o‘tdi.
O‘zbekiston Mudofaa vazirligi ma’lumotiga ko‘ra, mashg‘ulotlarga uch davlatning harbiy xizmatchilari, jangovar texnika, harbiy-dengiz va aviatsiya vositalari, shuningdek, uchuvchisiz uchish apparatlari jalb etilgan.
Mashg‘ulotlarning asosiy maqsadi qo‘shma operatsiyalarga tayyorgarlik darajasini oshirish, qo‘shinlar o‘rtasidagi muvofiqlikni yaxshilash, o‘quv tartib-taomillarini standartlashtirish hamda bo‘linmalarning jangovar imkoniyatlarini rivojlantirishdan iborat.
Uch bosqichli mashg‘ulotlar “Qizilgaya” markazi bilan birga Naxichevan Muxtor Respublikasidagi “Qorabog‘lar” o‘quv-mashg‘ulot markazi va Kaspiy dengizining Ozarbayjon sektoridagi “Buyuk Zira” o‘quv-mashg‘ulot hududida ham o‘tkaziladi.
