O‘zbekistonda telefon raqami orqali bank hisobvarag‘idan to‘g‘ridan-to‘g‘ri pul o‘tkazish imkoniyati yaratiladi
Markaziy bankning jismoniy shaxslar o‘rtasida mobil telefon raqami orqali pul o‘tkazmalarini amalga oshirish qoidalari tasdiqlandi. Hujjat 2026-yil 24-avgustda 3930-son bilan davlat ro‘yxatidan o‘tkazilgan bo‘lib, 26-noyabrdan kuchga kiradi.
Yangi tartibga ko‘ra, pul o‘tkazishda qabul qiluvchining bank kartasi yoki hisobvaraq raqamini kiritish shart bo‘lmaydi. Mobil telefon raqamini ko‘rsatishning o‘zi yetarli bo‘ladi. Mablag‘ to‘lovchining bank hisobvarag‘idan qabul qiluvchining telefon raqamiga bog‘langan bank hisobvarag‘iga Tezkor to‘lovlar tizimi orqali real vaqt rejimida o‘tkaziladi.
Buning uchun foydalanuvchi telefon raqamini bank hisobvarag‘iga bog‘lashi kerak. Mobil ilovada ro‘yxatdan o‘tgan raqam Bank depozitorlarining milliy axborot bazasida (BDMAB) real vaqt rejimida qayd etiladi. Bir bank doirasida bitta telefon raqamini faqat bitta hisobvaraqqa bog‘lash mumkin.
Shu bilan birga, bir telefon raqamini turli banklardagi hisobvaraqlarga bog‘lash mumkin. Pul o‘tkazishda tizim ushbu raqamga bog‘langan hisobvaraqlarni aniqlaydi va to‘lovchi kerakli bankni tanlaydi.
To‘lov tasdiqlanishidan oldin bank mijozga o‘tkazma summasi, qabul qiluvchining F.I.Sh. hamda komissiya mavjud bo‘lsa, uning miqdorini ko‘rsatishi shart.
Telefon raqami o‘zgartirilganda yangi raqam hisobvaraqqa avtomatik bog‘lanadi. Mijoz uni mobil ilova yoki bankka murojaat qilish orqali hisobvaraqdan ajratishi ham mumkin.
