O‘zbekistonning 2027-yilda MDHga raisligi davridagi ustuvor yo‘nalishlar belgilandi

Prezident Shavkat Mirziyoyev O‘zbekistonning 2027-yilda MDHga raisligi davrida asosiy e’tibor qaratiladigan yo‘nalishlarni bayon qildi.

Iqtisodiyot, yangi texnologiyalar, transport, xavfsizlik, ta’lim, ilm-fan va inson salohiyatini rivojlantirish ustuvor vazifalar bo‘ladi. Raislik «MDH – ishonch va umumiy taraqqiyot makoni» shiori ostida amalga oshiriladi.

Davlat rahbari iqtisodiy hamkorlikda sanoat kooperatsiyasiga asosiy e’tibor qaratishni taklif etdi. Shuningdek, siyosiy muloqotni mustahkamlash, raqamli texnologiyalar sohasidagi hamkorlikni kengaytirish va transport aloqalarini rivojlantirish muhimligi ta’kidlandi.

Xavfsizlik va barqarorlikni ta’minlash ham asosiy yo‘nalishlardan biri bo‘lib qoladi. Sammit yakunida MDH doirasidagi hamkorlikka oid bitim va qarorlar imzolandi.